نص وفيديو : كلمة الرئيس السيسى واحتفال الكلية الحربية

فيديو : http://youtu.be/9FbDzThst9Y

 https://www.youtube.com/watch?feature=player_embedded&v=Mp5Z0coFisc :

أعرب الرئيس عبد الفتاح السيسى عن شكره وتقديره لأسر الطلاب التى سهرت على أولادها لتقديمهم لمصر، كما وجه الشكر والتقدير إلى جميع الشهداء والمصابين من الجيش والشرطة والشعب، ليس فقط على مر الثلاث سنوات الماضية، ولكن على مر السنين.

وفيما يلى نص كلمة الرئيس عبد الفتاح السيسى التى ألقاها اليوم بالكلية الحربية:
“كمان فيه مناسبة جميلة بعد أيام قليلية إن شاء الله.. رمضان كريم.. فكل عام والمصريين بخير بمناسبة هذا الشهر ..مش عارف هيبقى فيه صرف كتير فى الشهر ده ولا هنحاول نظبط المسألة شوية.. يا ريت نقدر يبقى شهر كله عمل.. إصرار على العمل عشان خاطر بلدنا عشان خاطر مصر.

بنتكلم عن إن فيه تحديات كتير جدا موجدة فى مصر وخارج مصر.. فى مصر إحنا شايفين إن فيه تحديات اقتصادية وتحديات أمنية داخل وخارج مصر.. هناك تحديات كثيرة موجودة فى مصر وخارج مصر، ومصر نحن نشاهد أنها تواجه تحديات اقتصادية وحتى تحديات أمنية داخل وخارج مصر، وهناك جهد كبير يبذل لكى نتجاوز ونتغلب على هذه التحديات.

وهنا تحية واجبة أو مستحقة للقوات المسلحة والشرطة المدينة لأنهم بفضل الله عماد الأمن والاستقرار فى مصر ،والجيش المصرى بصراحة هو مشكلة أمام أى حد يحاول أن يقترب من مصر فى الداخل والخارج، لأن الجيش المصرى هو الضمير الحر للوطنية المصرية المؤسسة العسكرى فى مصر.. الضمير الحر للوطنية المصرية، وأن الجيش ده بتاع مصر مش بتاع حد، وعمره مكان بتاع حد ونحن حريصون على أنه يكون كذلك.

مصر أمانة فى رقبتنا كلنا، والمنطقة العربية كمان أمانة فى رقبتنا، كلنا ونحن قادرون إن شاء الله على حفظ الأمانة بوحدتنا وتماسكنا، وتفهمنا ونكران الذات والإيثار كله علشان خاطر بلدنا ومستقبلها.

من المهم أوى أن أفكر نفسى وحضراتكم جميعا إننى قولت دايما سأكون معكم بشفافية وبصدق وبأمانة، لأنها مسئوليتنا جميعا ومش مسئوليتى بمفردى، كان إمبارح فى نقاش حول موازنة مصر الخاصة بعام 2014 /2015، ولمدة 6 ساعات، كان هناك نقاش مع رئيس الوزراء ووزير التخطيط ونخبة أخرى من الوزراء.

أنا عاوز أكلمكوا بمنتهى الصراحة إن العرض الموجود.. وأنا قولت مقدرش أوافق عليه، وكان المفروض مفيش كلمة أنا مجهزها للموضوع ده دلوقتى، وأنا بكلمكوا لأن ده مسئولية ومسئولية الأجيال القادمة إلى إحنا هنسيبلهم بلدنا فوجدت عجز الموازنة بيزيد.. يعنى المديونية هتطلع إلى أكثر 2 تريليون جنيه علشان كده الموازنة اللى ممكن متعملش مشكلة مع الرأى العام فى مصر، لأن الموقف السياسى من وجهة نظر الحكومة لا يتحمل.

طيب وبعدين يعنى كل سنة منجابهش تحدياتنا ومشكلتنا بجد لغاية البلد ينفع يعنى، فقولت أنا هكلم الشعب المصرى بكل وضوح كده إن العشر شهور إلى فاتوا عدو لا.. كان فى أشقاء موجودين وواقفين معانا بس يا ترى إحنا هنفضل كده ولا إيه.. يعنى هنفضل كده ولا ممكن نيجى على نفسنا شوية، ولا حتى شويتين.. إحنا بنحرج نفسنا وبنحرج الناس.

أنا عاوز أقولكم على حاجة أنا قولت للحكومة مش هقدر أصدق على كده، وكمان مفيش برلمان بس أنا قولتلهم إنى مش هكلمكم بصراحة.. طيب وأنا مكلمكمش ليه يعنى.. ومكلمش المصريين ليه يعنى وأقولهم إن إحنا عندنا إجراءات محتاجين ناخدها محتاجين نيجى على نفسنا شوية، دول المصريين جدعان أوى ورجالة أوى، وحتى الستات بتاعتهم رجالة أوى بصحيح.

قلنا نراجع الموازنة لأن أنا مقدرش أتحمل إنى أوافق عليها ويكون بها هذا العجز عجز يعنى سلف، والدين الداخلى والخارجى لمصر يطلع من 1.7 إلى 2 ترليون و100 مليار، ودول بيبقوا عاوزين خدمات وفوائد لهذا الدين يعنى عبء أكثر علينا.. لا أنا مش هقدر أوافق على كده، طب إحنا محتاجين نعمل إجراءات ده صعب أوى الكلام ده.. أنا قولت قبل كده إن هذا الشعب لم يجد من يرفق به ويحنوا عليه.. أنا أريد أن أرفق بهذا الشعب وأحنوا عليه، وعاوز أخلى بالى من ولادى اللى جايين نسبلهم حاجة كويسة، وإحنا كده مش هنسبلهم حاجة كويسة .. إحنا لو فضل الدين يتزايد بالشكل ده مش هنسيب حاجة كويسة.

أنا قولت إن أنا ما كنتش مجهز كلمة لحضراتكم، واتكلمت بمنتهى الصراحة معاكم، وأنا بقول لينا جميعا أنا كان كلامى قبل الانتخابات إن إحنا محتاجين سنتين نبذل فيهم جهد، وناخد فيهم إجراءات، ثم بعد كده ننطلق بفضل الله سبحانه وتعالى.. هينفع إن احنا نطالب بمطالب فئوية تانى!! أنا بصراحة عاوز أقول إن اللى بيطالب ده مش واخد باله البلد مش هتستحمل كده، وبصراحة أنا مش هقدر ألبى مطلب واحد فئوى مش هيحصل.

لابد من بذل تضحيات حقيقية من كل مصرى ومصرية، “أنا بأحصل على مرتب الحد الأقصى، وهو مبلغ 42 ألفا، لن أخذ نصفه، وسأتنازل عن نصف ممتلكاتى من أجل مصر”.

لو كل واحد حط بلده أمام عينيه ومستعد لإعطائها، خاصة أن عدد المصريين كبير، سواء فى الداخل أو الخارج، لو قمنا بإعداد حسابات يسيطر عليها بشكل جيد، وأشرف عليها شخصيا هل نقدر أن نجد مساهمة من المصريين فى الداخل والخارج اللى قادر بدون ضغط وبدون حرج.

أنا أسف إننى أتحدث عن ذلك فى هذه المناسبة، لازم أتحدث إليكم يا مصريين، لقد وضعتم الأمانة فى رقبتى، وهى فى رقبتنا جميعا، ولذلك سنحتاج إلى اتخاذ إجراءات كى نستطيع حل هذه المسألة، وبقول لكل مصرى ومصرية ساعدونى، ساعدوا مصر.

وأشكر الجميع كل المصريين، الوقت ده وقت التكاتف، وقت الوحدة وقت مصلحة الوطن، وأنا متأكد بفضل الله سبحانه وتعالى، وأنا ادعوه أن يساعدنا لأن مصر تمر بظروف صعبة وهو قادر على كل شىء.

وآخر حديثى عن أحكام القضاء، حصل نقاش كثير على الأحكام التى صدرت من القضاء، أول اتصال بينى وبين وزير العدل أثناء مجلس الوزراء قلت له لن نتدخل فى أحكام القضاء، وفى اتصال السابعة صباحا مع الوزراء يوميا للاطمئان على أحوال البلاد، وقلت لن نتدخل فى شئون القضاء، لأن القضاء المصرى مستقل وشامخ، مؤسسات الدولة لا أحد يقترب منها، لا أحد يعلق أو يتكلم عليها إذا كنا بننشد دولة مؤسسات فلابد أن نحترم أحكام القضاء ولا نعلق عليها حتى لو الآخرين لم يتفهموا هذه الأحكام.

وأخيرا أشكر المصريين، وأطلب مساعدتكم لبلدكم مصر، وكل عام وأنت بخير، تحيا مصر.